Quba rayonunun Təngəaltı kəndində yerləşən körpü insanlar üçün təhlükəyə çevrilib.
Yerli sakinlərin Shimal.News -a verdiyi məlumata görə, kəndi Quba-Qonaqkənd yoluna bağlayan körpülərdən biri uzun müddətdir qəzalı vəziyyətdədir və hər an uçmaq təhlükəsi ilə üz-üzədir.
Vəlvələçaya gələn sel körpünün dayaqlarını yuyub aparıb.
“Burada hər an faciə ola bilər”, - deyə kənd sakinləri bildirir və bu təhlükənin artıq uzun illərdir aradan qaldırılmadığını vurğulayırlar.
Körpünün qəzalı olması kəndin sosial həyatına da təsirsiz ötüşməyib. İnsanlar təhlükə səbəbindən kənddən köçməyə başlayıblar.
“Evlərin əksəriyyətinin qapısı qıfıllıdır. Vaxtilə buralarda həyat qaynayırdı, indi isə kənd tərk edilmiş bir yerə çevrilib. Biz də normal şərait istəyirik” – deyə sakinlər qeyd edir.
Onların sözlərinə görə, məsələ dəfələrlə aidiyyəti qurumlara bildirilsə də, problem hələ də həll olunmamış qalır.
