Qubalı elm xadimi və iş adamı Əlibala Səttar oğlu Məhərrəmzadə ilk dəfə millət vəkili adını qazanacaq. ShimalNews xəbər verir ki, o, seçkilərin ilkin nəticələrinə görə 12023 səs (57.4 faiz) toplayıb.
Həmin dairədən namizədliyini irəli sürən Vahid Əhmədovun geri çəkilməsindən sonra o, deputatlıq mandatı uğrunda gedən mübarizədə ən iddialı şəxs kimi görünürdü.
Əlibala Məhərrəmzadə 1976-cı il avqustun 9-u Qubada anadan olub. O,1993-1997-ci illərdə Azərbaycan Xalq Təsərrüfatını İdarəetmə İnstitutunun (UNEC) İdarəçilik fakültəsində bakalavr pilləsi üzrə təhsil alıb. Həmin təhsil illəri müddətində Turan Yazqanın təşəbbüsü ilə Türkiyənin Boğazıçı Universitetində təhsil alıb. 1999-cu ildə İstanbul Universitetinin İqtisadiyyat şöbəsini bitirərək, iqtisad elmləri Professoru elmi dərəcəsininə yiyələnib.
Biznes fəaliyyətində gəldikdə Ə.Məhərrəmzadə 2006-ci ildə “Caspian Audit Company” MMC-ni təsis edib. O, indi də həmin şirkətin direktorudur. Eyni zamanda, o, Azərbaycan orta əsrlər tarixini əks etdirən “Atabəylər: Şəmsəddin Eldəniz” çoxseriyalı bədii-sənədli filminin prodüseri olan “Shahdag Cinema Production” MMC -nin təsisçisidir. 2015-ci ildə “Şahdağ İdman Klubu”-nu yaradıb. 2019-cu ilin dekabrında açılışı olmuş Ukrayna Ticarət Evinə də rəhbərlik edir. Eyni dövrdə “Şahdağ Quba Truskavets” Tibbi Sanatoriyasını təsis edib.
Xatırladaq ki, Ə.Məhərrəmzadə 2010-cu ildə də parlament seçkilərində namizədliyini irəli sürüb. O, 20 saylı Nərimanov ikinci seçki dairəsindən deputatlığa namizəd olsa da, uğur qazana bilməyib.
Ailəlidir, dörd övladı var.
