Qusar rayonunun Cibir kəndi Vətən müharibəsində 4 şəhid verib. Qəhrəman kəndin şəhid övladlarından biri 18 yaşlı Malik Xeyirbəyovdur. Malik Füzulinin azad olunması uğrunda gedən şiddətli döyüşlərdə şəhidlik zirvəsinə ucalıb. Qəhrəman döyüşçü ölümündən sonra üç medalla təltif edilib.

Malik Xeyirbəyov 2002-ci ildə Qusar rayonunun Cibir kəndində anadan olub. Evin böyük övladı olan Malikin iki qardaşı və bir bacısı var.

Şəhidin atası deyir ki, Malik 2008-ci ildə birinci sinfə gedib. Dərslərini yaxşı oxuyub. Sonra kollecə qəbul olundu. Birinci kursu bitirdikdən sonra əsgərliyə yollandı. Komandirlərinin dediyinə görə, Vətən müharibəsində cəsurluğu, igidliyi ilə seçilən əsgərlərdən olub. Telefonla danışanda hər şeyin yaxşı olduğunu, torpaqlarımızı düşməndən azad etdiklərini bildirirdi. Çox cəsarətli oğul idi. Fiziki göstəricilərinə görə kəşfiyyatçı seçilmişdi. Cəbrayıl, Füzuli, Hadrut uğrunda döyüşlərdə iştirak edib. Vətən uğrunda şəhidlik zirvəsinə ucaldı.

Şəhidin anası Sima Xeyirbəyova Malikin yoxluğunu qəbul edə bilmir, hələ də gözü yollardadır: “Elə bilirəm nə vaxtsa qayıdıb gələcək. Ağıllı, mehriban, tərbiyəli uşaq idi. Arzuları çox idi. Kolleci qurtarıb ali məktəbə qəbul olmaq istəyirdi. Oğlumun müharibədəki şücaəti barədə eşitdiklərim məni ana kimi çox qürurlandırır. O, bu dünyadan şərəfli ölümlə köçdü, Vətən yolunda şəhid oldu. Mən bununla özümə təsəlli tapıram. Torpaqlarımızın azad olunmasında mənim balamın da payı var”.

Kəşfiyyatçı Malik Xeyirbəyov Cəbrayıl, Hadrut və Füzulinin azad olunması əməliyyatlarında fəal iştirak edib. Oktyabrın 26-da Füzuli şəhəri istiqamətində şəhidlik zirvəsinə ucalıb.

Şəhidin bacısı Ayna da qardaşı ilə fəxr edir: “Qardaşım zəhmətkeş, zarafat xoşlamayan idi. Həmişə təsərrüfat işlərində atama kömək edərdi. Kənddə də böyükdən-kiçiyə hamı tərəfindən sevilirdi. Şəhidlik uca bir zirvədir. Şəhid bacısı olmağımla fəxr edirəm”.

Şəhid Malik Xeyirbəyov ölümündən sonra “Füzulinin azad olunmasına görə”, “Vətən uğrunda” və “İgidliyə görə” medalları ilə təltif olunub.