Quba-Xaçmaz yolunun Timiryazev qəsəbəsindən keçən hissəsində təhlükəli vəziyyət hökm sürür.
Baku TV xəbər verir ki, ərazidə yaşayan sakinlər 10-a yaxın qurumuş ağacın aşma təhlükəsindən narahatdırlar.
"Bir neçə gün əvvəl külək oldu, iki gün işıqsız qaldıq. Quruyan budaqlar elektrik xətlərini qırmışdı. Hətta evin üstünə də düşüb. Birinin başına düşsə, kim cavabdeh olacaq?!", - deyə sakinlər narazılıq bildiriblər.
Qeyd edək ki, sentyabrın 2-də güclü külək nəticəsində iri ağac aşaraq sakinlərə ziyan vurub.
Quba şəhər ərazi dairəsi üzrə icra nümayəndəsinin müavini Elnur Manafov bildirib ki, qurumuş ağaclarla bağlı rayon ərazisində mütəmadi olaraq tədbirlər görülür.
“İndiyə kimi həm budanma, həm də təhlükə yaradan quru ağaclarla bağlı mütəmadi olaraq müvafiq tədbirlər görülmüşdür. Hazırda növbəti dəfə quru ağacların qeydiyyat işləri aparılır. Bu barədə Ekologiya və Təbii Sərvətlər Nazirliyinə (ETSN) məktub ünvanlanmışdır. Nazirliyin verəcəyi qərara uyğun olaraq tərəfimizdən müvafiq tədbirlər görüləcək” - qurum rəsmisi söyləyib.
