Qubanın göz bəbəyi olan Qudyalçay növbəti ekoloji cinayətin qurbanına çevrilir.
Shimal.News-un əldə etdiyi məlumata görə, şəhər üçün mühüm strateji əhəmiyyət daşıyan bu çay, Quba Peşə Liseyi üçün inzibati bina inşa edən tikinti şirkəti tərəfindən ekoloji terrora məruz qalır. Bura beton qırıntıları və görülən işlərdən qalan digər artıq materiallar atılır.
Təəssüf ki, bu ekoloji cinayətə cavabdeh olan 5 saylı Ekologiya və Təbii Sərvətlər İdarəsi isə məsələyə biganə yanaşır.
Qudyalçay Quba üçün təkcə su mənbəyi deyil, həm də regionun simvollarından biridir. Yazın gəlişi ilə çayın coşub-daşdığı, onun sahillərinin həyat bəxş etdiyi bir vaxtda, bu təbiət möcüzəsinin tikinti tullantıları ilə çirkləndirilməsi vandalizmdən başqa bir şey deyil. Əgər bu gedişlə davam edərsə, gələcək nəsillər Qudyalçayı mavi suları ilə deyil, betona bürünmüş quru bir dərəyə bənzədəcəklər.
Maraqlıdır, ekologiya idarəsi niyə susur? Görünür, bu qurum üçün ya "ekologiya" sözünün mənası dəyişib, ya da məsul şəxslər Qudyalçayın zibilxanaya çevrilməsindən xəbərsizdirlər. Amma bir şey bəllidir: çayın suyuna qarışan hər tullantı, göz yumanların vicdanına da yapışacaq.
Əgər bu cür özbaşınalıq davam edərsə, sabah başqa bir tikinti layihəsi başlayanda, tullantılar Qudyalçaydan çıxıb şəhərin küçələrinə səpələnəcək. Çünki nəzarətsiz buraxılan qanunsuzluq, gec-tez hamının qapısını döyəcək. Bu gün Qudyalçay çirklənir, sabah isə onun sahillərində yaşayan insanların sağlamlığı təhlükəyə düşəcək.
Təbii ki, burada tək günahkar tikinti şirkəti deyil. Əgər ona göz yumulursa, demək ki, məsuliyyət daşıyan dövlət qurumları da bu cinayətdə pay sahibidir. Hər kəs susursa, bu artıq qanunsuzluğun adi hala çevrildiyinin göstəricisidir.
Qudyalçayın sularını çirkaba qərq edənlər, sabah bu çayın qəzəbindən qaça biləcəklərmi? Axı təbiət bağışlamır, unutmur, sadəcə bir gün cavabını qaytarır...
Səma Xəlil
