Xaçmaz rayonunun Qusarçay kəndindən keçən beton su arxı artıq təyinatı üzrə istifadə olunmur. Arxdan su əvəzinə müxtəlif məişət tullantıları axır. Mövcud vəziyyət zibil poliqonunu xatırladır.
Bu barədə Shimal.News-a danışan sakinlər bildiriblər ki, uzun müddətdir təmizlik işləri icra olunmur. Nəticədə tullantılar toplanaraq arx suyunun kənara daşması ehtimalını artırıb. Bildirilir ki, yaranmış vəziyyət yaxınlıqdakı yaşayış evləri üçün subasma təhlükəsini yaradır.
Kənd sakinləri qeyd edirlər ki, problem illərdir mövcuddur, lakin bu müddət ərzində aidiyyəti qurumlar tərəfindən heç bir ciddi tədbir görülməyib. Xüsusilə yay aylarında ərazidə kəskin üfunət iyi insanların sağlam yaşaması üçün ciddi təhlükə hesab olunur. Onların sözlərinə görə, son vaxtlar kənddə azyaşlı uşaqlar və yaşlılar arasında müxtəlif xəstəliklərin sayı artıb.
Sakinlər bildiriblər ki, məsələ ilə bağlı Qusarçay bələdiyyəsinə dəfələrlə müraciət edilsə də, indiyədək nəticə əldə olunmayıb. Vəziyyətə biganə münasibət göstərilir.
Qusarçay kənd sakinləri aidiyyəti qurumlardan vəziyyətə təcili müdaxilə edilməsini, Azərbaycan Su Ehtiyatları Agentliyinin Xaçmaz Suvarma Sistemlərinin balansında olan beton su arxının tullantılardan təmizlənməsini və ərazidə sanitariya şəraitinin yaxşılaşdırılmasını tələb edirlər.
