Siyəzəndə mühəndis Cavid Yəhyayev yararsız metal və müxtəlif tullantılardan iki metr hündürlüyündə "dəmir cəngavər" hazırlayıb.
Əl işi 4 ay müddətində ərsəyə gəlib. Təxminən 200 kiloqram ağırlığında olan nəhəng fiqurun hazırlanmasında 200-dən çox detal istifadə edilib.
"Dəmir cəngavər" daşınmasını asanlaşdırmaq üçün bir-birindən ayrılan 5 hissədən ibarətdir.
Fiqura yaxından baxdıqda onun hansı materiallardan hazırlandığını görmək mümkündür. Burada yararsız kəlbətinlər, mühərrik zəncirləri, sınmış çilingər alətləri, avtomobil yayları, şamlar, velosiped hissələri, kreslo altlıqları və digər metal detallardan istifadə olunub.
Beləliklə, artıq işə yaramayan yüzlərlə detal Siyəzənli mühəndisin əlində iki metrlik "dəmir cəngavər"ə çevrilib.
Mənbə: Azərtac
