Xaçmaz rayonunun Hacılar kəndində arvadını öldürməyə cəhddə ittiham edilən şəxsin cinayət işi üzrə məhkəmə araşdırması başa çatıb. Hadisənin baş verməsinin təfərrüatı məlum olub.
Musavat.com-un məlumatına görə, 1991-ci il təvəllüdlü Aynur Əhmədova əri 1988-ci il təvəllüdlü Allahverdi Mustafayev tərəfindən bıçaqlanıb.
Hadisə ailə münaqişəsi zəminində baş verib. Belə ki, ər-arvad arasındakı münasibətlər soyuduqdan sonra müxtəlif səbəblərlə onlar arasında dava-dalaş olurmuş. Hadisə günü Allahverdi sərxoş vəziyyətdə olub. O, həyətdə ona məxsus olmayan siqaret kötükləri gördüyü üçün şübhələnib. Buna görə də uşaqlarının gözü qarşısında arvadına çoxsaylı zərbələr endirib. Allahverdi arvadını bıçaqlamaqla yanaşı ona çoxsaylı ayaq zərbələri də endirib. Səsə gələn şəxslərin müdaxiləsi ilə zərərçəkmiş qadın xəstəxanaya vaxtında çatdırılıb.
Allahverdi əməlindən peşman olduğunu deyib. Onun xanımı isə ərinə xəyanət etmədiyini, Allahverdinin sərxoş olduğu üçün belə düşündüyünü deyib.
Təqsirləndirilən Allahverdiyə qarşı Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə ittiham irəli sürülüb. Allahverdi Mustafayev 11 il 3 ay azadlıqdan məhrum edilib.
