İkinci Dünya müharibəsində Qubadan 9800 nəfər insan iştirak edib. Onların 6600 nəfəri həlak olub və ya itkin düşüb. Müharibədən qayıdan qubalılardan biri də Qaflan Ömərovdur.
Quba rayonunun Ərməki kəndində 1924-cü ildə dünyaya gələn Qaflan Ömərov 1942-ci ildə SSRİ ilə Almaniya arasında başlayan müharibəyə könüllü olaraq qatılıb və ön cəbhədə faşistlərə qarşı vuruşub. Hərbi əməliyyatlarda göstərdiyi şücaətə görə dəfələrlə təltif olunan Qaflan kişinin döyüş yolu Moskvadan Smolenskə qədər olub.
O, 1943-cü il martın 6-da ağır yaralandıqdan sonra bir müddət hospitalda müalicə olunub və Qubaya qayıdıb. Müharibənin ağır və dəhşətli günlərini yaşayan veteran cəbhədən qayıtdıqdan sonra müxtəlif vəzifələrdə çalışıb.
24 orden-medalı, 100-dən artıq fəxri fərmanı olan Qaflan Ömərov dəfələrlə Prezident İlham Əliyevlə görüşlərdə iştirak edib. Prezident tərəfindən ona hər il pul mükafatı verir. Ümummilli Lider Heydər Əliyev isə ona Bakıda ev və maşın bağışlayıb.
