Şimal bölgəsində müşahidə edilən yağıntılar çayların sululuğuna təsir edib. Bu barədə ShimalNews 21 fevral tarixində APA-ya istinadən məlumat verir.
"Böyük Qafqazın Quba-Xaçmaz bölgəsində digər ərazilərlə müqayisədə bu il daha çox yağıntı müşahidə olunub ki, bu da çayların sululuğuna təsir edib. Hazırda bölgənin əsas çaylarında sululuq ongünlük normanın 147 faizini təşkil edir. Kür-Qıraqkəsəmən məntəqəsində sululuq ongünlük normanın 76 faizini, Qanıx-Cəlayir məntəqəsində isə 33 faizini təşkil edir" - Milli Hidrometeorologiya Xidmətinin rəisi Umayra Tağıyeva bildirib.
Xidmət rəsmisi, həmçinin qeyd edib ki, qış aylarında çaylarda aşağı sululuq olur, dağlarda mənfi temperatur və yağıntı qar şəklində olduğu üçün bəzi çayların mənbəyi donur.
