Qusar rayonunun Ləzə kəndində turizm infrastrukturunun yaradılması nəzərdə tutulub. Dövlət Turizm Agentliyi sözügedən işlərin icrasının 1 milyon 148 min 473 manata başa gələcəyini proqnozlaşdırıb. Agentlik bu layihənin bir hissəsini Qubanin Xınalıq kəndində icra edib.
Bəs görəsən, turizm potensialını artırmaq üçün nələr ediləcək? Ərazini digərlərindən fərqləndirmək üçün hansı tədbirlər planlaşdırılır?
Məsələ ilə bağlı Shimal.News-un əməkdaşı Dövlət Turizm Agentliyinə sorğu ünvanlayıb.
Dövlət Turizm Agentliyindən bildirilib ki, məsələ ilə bağlı qalib gələcək şirkət tərəfindən işlərə başlandıqdan sonra məlumat verilə bilər.
Mövzu ilə bağlı Shimal.News-a açıqlama verən turizm eksperti Ceyhun Aşurovun sözlərinə görə, infrastruktur layihələrinə yönləndirilən investisiyalar əslində turizmin inkişafına müsbət təsir göstərir:
“Əlbəttə ki, bu kimi layihələr maraqlıdır. Bir sıra regionlarda bu kimi layihələr olub. İnfrastruktur layihələrinə yönləndirilən investisiyalar əslində turizmin inkişafına müsbət təsir göstərir. Çünki burada yolların düzəlməsi, müəyyən parkların salınması, insanların istirahəti üçün xüsusi və daha gözəl şəraitin yaradılması, sahibkarlıq fəaliyətinin inkişaf etdirilməsi üçü müəyyən şərtlərin asanlaşdırılması, lazım olan yerlərə kommunal xətlərin çəkilməsi daxildir”.
C.Aşurov qeyd edib ki, kənd evlərinin sahibkarlıq fəaliyyəti işlərinə cəlb edilməsi də müsbət təsirini göstərəcək:
“Gələcəkdə yatırım məqsədli əlavə investisiyaların cəlb olunması da müsbət mənada öz təsirini göstərəcək. Turizmin əsas elementləri kimi hər biri investisiya ilə bağlıdır. Amma ilk növbədə həmin ərazidə kifayət qədər şərait yaradılmalıdır. Normal yollar olmalıdır ki, əhaliyə xidmət etmək asan olsun”.
Nəzrin Vahid
