Şimal bölgəsində bu il gilas bağlarından bol məhsul gözlənilsə də, hava şəraitindəki kəskin dəyişikliklər fermerlərin ümidi ilə yanaşı, məhsuldarlığı da yerlə-yeksan edib. Son günlərdə gecələr müşahidə olunan soyuq hava və gündüz saatlarında temperaturun qəfil yüksəlməsi yetişməkdə olan meyvələrin tökülməsinə səbəb olub.
Xüsusilə Quba, Qusar və Xaçmaz rayonlarında yerləşən iri gilas bağlarında vəziyyət daha ciddi xarakter alıb.
Shimal.News-a müraciət edən fermerlər bildirirlər ki, gilas ağacları çiçəkləmə və meyvə bağlama mərhələsində olarkən bu cür hava dəyişkənliyi meyvələrin inkişafına mane olub. Nəticədə, ağacların üzərindəki meyvələr ya tam yetişməmiş tökülüb, ya da quruyub.
Qubanın Amsarqışlaq kəndində bağçılıqla məşğul olan fermer Nizami Teymurov vəziyyəti belə izah edir:
“Gecə 3-4 dərəcəyə enən, günorta saatlarında da 20-22 dərəcəyə yüksələn istilik gilas ağaclarını sarsıtdı. Bu cür dəyişiklik gilasın bioloji tarazlığını pozur. Ağaclar sanki ‘şoka’ düşür”.
Kənd Təsərrüfatı üzrə ekspertlər də bu halın səbəbini iqlim dəyişikliyi və bölgədə yaranan mikroiqlim təsirləri ilə əlaqələndirirlər. Onlar bu cür hallara qarşı fermerlərə aqrar sığortadan yararlanmağı tövsiyə edirlər.
