Ceyran Bayramova Azərbaycanın ilk inqilabçılarından və qadın hərəkatının başçılarından biri idi. Şərqdə ilk dəfə olaraq öz mənzilində qadınlar klubu yaradan Ceyran, ölkənin ictimai-siyasi həyatında fəal iştirak edib, Azərbaycan qadınlarının birinci qurultayının keçirilməsində böyük rol oynayıb.
Ceyran Şirin qızı Bayramova 1896-cı il martın 22 də Quba rayonunun Zərqava kəndində qulluqçu ailəsində anadan olub. O ilk təhsilini Bakıdakı rus-tatar məktəbində alıb. Şəhərdəki qızlar gimnaziyasından da məzun olduqdan sonra ali təhsil almaq üçün Rusiyaya getmək istəsə də, 1917-ci il inqilabı buna imkan vermir.
O, ailə həyatı qurub, həmişəlik Bakıya köçür. 1920-ci ildə Ceyran Bayramova qaynı, inqilabçı Əli Bayramovun adına Qadınlar Klubu açır. Bu klub qadınlarla bağlı ilk ictimai qurumlardan biri idi. Ceyran xanım bu imkanlardan istifadə edərək ətrafına fəal qadınları toplamağa başlayır.
1924-cü ildə alman siyasətçisi Klara Setkin Əli Bayramov adına kluba gələrək, onun fəalları ilə tanış olur və gördüklərindən təsirlənərək qadın klubunu “inqilabi qüvvələrin toplanış məntəqəsi” adlandırır.
4 iyul 1934-cü ildə Ceyran Bayramova “vətən xaini”nin həyat yoldaşı kimi həbs olunur. Bundan sonra 1937-ci il sentyabrın 8-də 8 il müddətinə azadlıqdan məhrum edilir. O, cəzasını çəkmək üçün Qazaxıstanın Akmola (indiki Nur-Sultan) həbs düşərgəsinə göndərilir.
1955-ci il dekabrın 14-də Ceyrana bəraət verilir. Bakıya qayıtdıqdan sonra o, yenidən ictimai-siyasi həyata qatılır. Ceyran Bayramova 2 dəfə “Lenin” ordeni, həmçinin “Oktyabr inqilabı” orden ilə təltif olunub.
Ceyran Bayramova 1987-ci ildə vəfat edib.
