Təsəvvür edin ki, bir kəndin iki sakini bir süfrəyə oturmalıdır. Amma biri israrla digərinin boşqabına tullantı tökür. Digəri isə əlacsız halda buna dözmək məcburiyyətində qalır.
Shimal.News xəbər verir ki, hazırda Qubanın Zərdabi qəsəbəsində yaşanan mənzərə məhz budur – kanalizasiya suları fermerlərin bağlarına axıdılır, sakinlərin isə alternativi yoxdur.
Yerli icra nümayəndəsi, bələdiyyə sədri və digər aidiyyəti qurumlar buna illərdir göz yumur. Bu su fermerlərin torpağında yetişən məhsulu zəhərləyir, təsərrüfatı məhv edir. İcra orqanları isə hər dəfə vədlər verir, amma nəticə dəyişmir.
Bu vəziyyətdə sakinlər də haqlıdır, fermerlər də. Fermer deyir ki, “mənim bağımı zəhərləyirsiniz”, sakin isə bildirir ki, “bəs biz hara axıdaq?”. Hər iki tərəf çıxılmaz vəziyyətdədir. Suvarma sistemləri və kanalizasiya infrastrukturu yaratmaq bələdiyyənin, icra nümayəndəsinin və məsul qurumların borcudur.
Kanalizasiya sularının düzgün idarəsi elə də mürəkkəb məsələ deyil. Dünyanın inkişaf etmiş ölkələrində çirkab sular təmizlənərək kənd təsərrüfatında istifadə olunur. Amma bizdə necədir? Problemi həll etmək əvəzinə “onsuz da illərdir belədir” prinsipi ilə hərəkət edirlər. Görünən odur ki, məsələ həlli olmayan problem deyil, sadəcə üzərində çalışan yoxdur.
Bu vəziyyət belə davam edərsə, fermerlər ziyan çəkəcək, sakinlər isə bir gün məcbur qalıb başqa çıxış yolu axtaracaqlar. Bu zaman məsuliyyət kimdə olacaq? Yoxsa yenə də "bizim xəbərimiz yoxdur" deyib, məsuliyyətdən yayınacaqlar?
Əgər aidiyyəti qurumlar məsələni vaxtında həll etməsə, bir müddət sonra Zərdabi qəsəbəsi ya məhsul yetişdirmək üçün yararsız bir əraziyə çevriləcək, ya da insanlar bir-birinə qarşı daha da aqressivləşəcək.
Problem isə nə sakinlərdən, nə də fermerlərdən asılıdır. Həll etməli olanlar məlumdur. Bəs görəsən onlar nə vaxt hərəkətə keçəcəklər?
