“Bələdiyyələr müstəqil idarəetmə orqanlarıdır, icra hakimiyyəti olaraq qətiyyən bələdiyyələrin işinə müdaxilə edib qarışmaq fikrimiz yoxdur. Sadəcə, bu tədbiri keçirməkdə məqsəd odur ki, bələdiyyələrimiz işlərini düzgün qursunlar”.
Bizim.Media məlumatına görə, bu fikirləri Qusar İH başçısı Sahir Məmmədxanov Qusardan yeni seçilən və 10 bələdiyyədə birləşən bələdiyyə üzvləri və sədrləri, Qusar İH-nin ərazi üzrə icra nümayəndələri ilə görüşdə bildirib.
"Bələdiyyələrin üstündə olan "torpaq satır" damğasını götürək. Siz camaatla işləyin, onların yanında olun. Camaatın arasında olun, köməyə ehtiyacı olan sakinlərin yanında olun, sizi həmin insanlar seçib. Qusarda və kəndlərdə satılası torpaq qalmayıb".
Qusar icra başçısı bələdiyyələrin mühasibat uçotunun yox dərəcəsində olduğunu da vurğulayıb:
“İşinizi bu istiqamətdə düzgün qurun, inventarizasiyanızı aparın, hansı əmlaka və inventara sahib olduğunuzu bilin".
Sahir Məmmədxanov hər bir bələdiyə üzvünə tövsiyə edib ki, işlərini “Bələdiyyələr haqqında” qanunun tələbləri çərçivəsində qursunlar, camaatın bələdiyyələrə olan inamını, etibarını qazansınlar, həmçinin görüləcək işləri kəndlərin ağsaqqalları ilə məsləhət etsinlər.
