Quba rayonu ərazisində baş verən it dişləməsi ilə bağlı TƏBİB-dən Shimal.News-a açıqlama verilib.
07.01.2025-cü il tarixində müxtəlif saatlarda Quba rayonu ərazisində baş verən it dişləməsi səbəbilə xəsarət alan 3 nəfər Quba Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya olunub.
2018-ci il təvəllüdlü şəxsə (kişi cinsli) sol yanağın və gicgah çənə nahiyəsinin çoxsaylı cırılmış açıq yarası, 1960-ci il təvəllüdlü şəxsə (qadın cinsli) burunun kəsilmiş cırılmış açıq yarası, sağ saidin didilmiş sıyrılmış yarası, 1959-cu il təvəllüdlü şəxsə (qadın cinsli) isə sağ əlin 3 və 4 cü barmaqlarının kəsilmiş cırılmış yarası, sağ saidin arxa səthinin kəsilmiş açıq yarası diaqnozu təyin olunub.
Zərərçəkmişlərə ilkin zəruri tibbi yardım göstərildikdən və quduzluq əleyhinə vaksin vurulduqdan sonra onlardan iki nəfər - 1960-cı il və 2018-ci il təvəllüdlü pasiyentlər həmin günü Bakı şəhərində yerləşən Sabunçu Tibb Mərkəzinə təxliyə olunublar.
1959-cu il təvəllüdlü şəxs isə zəruri tibbi xidmətlər göstərildikdən sonra ambulator müalicə üçün evə buraxılıb.
09:30
Quba rayonunun Qəçrəş və Küsnətqazma kəndlərində sakinlər sahibsiz itlərin hücumüna məruz qalıblar.
Shimal.News-un əldə etdiyi məlumata görə, Quba Rayon Mərkəzi Xəstəxanasına daxil olan 3 nəfərə it dişləməsi diaqnozu qoyulub.
Məlum olub ki, Küsnətqazma kənd sakini 5 yaşlı Məhəmməd Nurlan oğlu Məhəmmədov, Qəçrəş kənd sakini 65 yaşlı Zöhrə Aslan qızı Mərdiyeva və 66 yaşlı Raida Osmanpaşa qızı Salahova ağır xəsarətlər alıblar.
Quba Rayon İcra Hakimiyyətinin tapşırığına əsasən Quba bələdiyyəsi hərəkətə keçib. Hazırda Qubada sahibsiz itlərin sığınacaqlara toplanması icra olunur.
