Şabran rayon Pirəbədil bələdiyyəsinin sədri olmuş Cəmaləddin Nuriyev barəsindəki hökmdən apellyasiya məhkəmə iclası başa çatıb. ShimalNews Pravda.az-a istinadən xəbər verir ki, Sumqayıt Apellyasiya Məhkəməsinin hakimi Azər İsmayılovun sədrliyi ilə keçirilən prosesdə qərar elan olunub.
Sabiq məmurun 4 il müddətinə azadlıqdan məhrumetmə hökmü qismən ləğv edilib, onun cəzası 3 ilə endirilib.
İttihama görə, Cəmaləddin Nuriyev ümumilikdə 102.300 manat dəyərində 2.57 ha torpaq sahəsini 17.084 manata 28 şəxsə satıb. Həmin vətəndaşlardan təxminən 17 nəfəri hərrac yolu ilə Şabran rayonu Pirəbədil bələdiyyəsindən torpaqlarını alıb. Qalan vətəndaşlar isə kəndin sakinləri olduqları üçün onlara torpaq alqı-satqı yolu ilə satılıb. Araşdırmalar zamanı torpaq sahələrinin dəyərindən qat-qat aşağı satıldığı məlum olub. Bildirilir ki, 0.12 ha torpaq sahəsini 4.300 manatdan aşağı olmayan məbləğə satılmalı olduğu halda, 2017-ci il tarixli qərarla həmin torpaq sahəsini 1.000 manata satılıb.
Baş Prokuror yanında Korrupsiyaya qarşı Mübarizə Baş İdarəsinin keçirdiyi əməliyyat zamanı C.Nuriyev saxlanılıb.
