Bakı Dövlət Universitetinin (BDU) Coğrafiya, Ekologiya və torpaqşünaslıq fakültələrinin əməkdaş və tələbələrindən ibarət nümayəndə heyəti Qafqazda ətraf mühit sahəsində qeyri-hökumət təşkilatları şəbəkəsinin (CENN) Şabran rayonunda təşkil etdiyi “Qafqaz geoparkları şəbəkəsi: Azərbaycanda geoparkların yaradılması imkanları” proqramının ikinci koordinasiya tədbirində iştirak ediblər.
BDU-dan Shimal.News-a bildirilib ki, tədbirdə CENN-in nümayəndəsi Vaxtanq Koçaradze və layihənin Azərbaycan üzrə əlaqələndiricisi, Xəzər Universitetinin Ekoloji Tədqiqatlar Mərkəzinin rəhbəri Rövşən Abbasov, beynəlxalq və yerli ekspertlər iştirak ediblər. BDU-nun Ekologiya və torpaqşünaslıq fakültəsinin Ekoloji kimya kafedrasının dosenti Təranə Əliyeva, Coğrafiya fakültəsinin sosial məsələlər və tələbələrlə iş üzrə dekan müavini Qoşqar Məmmədov, Xarici ölkələrin iqtisadi-siyasi coğrafiyası kafedrasının baş müəllimi Vüqar Dərgahov, tyutor İsmayıl Rəhimli, doktorant Tamerlan Mehdiyev və magistrant İmran Bayramov koordinasiya iclasının müzakirələrinə qatılıblar.
Müzakirə zamanı geoparkların təşkilinin turizm baxımından əhəmiyyəti və səmərəli idarəetmə metodları barədə çıxış edən Vüqar Dərgahov Cənubi Qafqazda və bilavasitə Azərbaycan Respublikasında geoparkların yaradılmasının sosial-iqtisadi aspektləri barədə məlumat verib. O bildirib ki, geoparkların təşkili geoloji-geomorfoloji irsin mühafizəsi ilə yanaşı, yerli icmaların dayanıqlı inkişafı və turizm sahəsində məşğulluğun artırılmasında mühüm rol oynayır. Vüqar Dərgahov Azərbaycanda geoparkların təşkilində müvafiq potensiala malik ərazilərin turizm baxımından qiymətləndirilməsinin vacibliyini vurğulayıb. Bildirib ki, geoparkların vahid destinasiya kimi inkişafı, brendinqi və beynəlxalq səviyyədə tanıdılması ölkəmizin geoloji irsinin təbliğində və turizm sektorunun inkişafında yeni mərhələ olacaq.
BDU-nun Ekologiya və torpaqşünaslıq fakültəsinin Ekoloji kimya kafedrasının dosenti Təranə Əliyeva Abşeron göllərinin ekoloji vəziyyəti, problemləri, ekoloji-kimyəvi tədqiqi, kafedranın elmi istiqamətinə uyğun olaraq, Qobustan və Azərbaycanın digər bölgələrində olan palçıq vulkanları, onların ekokimyəvi tədqiqi haqqında ətraflı məlumat verib.
Tədbirdə dövlət, özəl, sənaye və təhsil sahələrindən olan mütəxəssislərin iştirakı ilə müzakirə aparılıb, geoparkların təşkili ilə bağlı işçi qrupunun yaradılmasına dair qərar qəbul olunub. Komissiyanın qərarı ilə Vüqar Dərgahov və Təranə Əliyeva işçi qrupuna daxil ediliblər.
