Şabran rayonunda XVII əsr abidəsi olan Pir Xəlil türbəsi talan edilib. Shimal.News xəbər verir ki, bir müddət öncə naməlum şəxs və yaxud şəxslər bir az aralıdan türbədəki qəbirin alt hissəsinə qədər tunel qazıblar. Gilgilçay kəndi yaxınlığında yerləşən türbənin içərisində XVII əsr Sufi dərvişlərindən sayılan Pir Xəlil adlı şəxs dəfn edilib. Uzun müddət baxımsız qaldığı üçün abidə aşınmaya məruz qalıb. Divarlarında çatlar əmələ gəlib, üzərindəki lövhə silinib. Yerli sakinlər bildirirlər ki, bir müddət əvvəl naməlum şəxs və yaxud şəxslər tunel qazaraq qəbirin alt hissəsinə eniblər. Oradan nəyin aparıldığını isə heç kim bilmir. Baxımsızlıqdan və alt hissəsi qazıldığından məzar çökmə təhlükəsi ilə üzləşib.
Qeyd edək ki, Pir Xəlil türbəsi Mədəni İrsin Qorunması, İnkişafı və Bərpası üzrə Dövlət Xidməti tərəfindən qeydiyyata alınan tarixi abidələrdəndir.
