Şabran şəhərinin Xudu Məmmədov küçəsində yaşanan antisanitar vəziyyət sakinlərin ciddi narazılığına səbəb olub.
Şəhər sakinlərinin Shimal.News redaksiyasına verdikləri məlumata görə, bu ərazidə məişət tullantıları uzun müddət ərzində yığışdırılmır və nəticədə küçə zibilliyə çevrilib.
Mənbələrin bildirdiyinə görə, bəzi hallarda zibil aylarla ərazidə qalır. Bununla yanaşı, yay aylarında yaranan dözülməz qoxu ətraf ərazilərdə yaşayan insanların sağlamlığı üçün də təhlükə yaradır.
Şikayətçilərin sözlərinə görə, aidiyyəti qurumlar yalnız üfunət pik həddə çatdıqda və narazılıqlar artdıqda müdaxilə edir, bu da problemin sistemli həll olunmadığını göstərir.
Sakinlər bildirirlər ki, bu problemin kökündən həlli üçün müvafiq qurumların məsuliyyətli yanaşması vacibdir. Əks halda, şəhərin ekoloji vəziyyəti və ümumi görünüşü daha da pisləşəcək.
Qeyd edək ki, mütəxəssislər məişət tullantılarının vaxtında daşınmamasının ekoloji fəlakətə səbəb olacağını bildirirlər. Belə ki, zibilliklərdən ayrılan zərərli qazlar atmosferə yayılaraq hava çirkliliyini artırır, eləcə də müxtəlif infeksion xəstəliklərin yayılmasına şərait yaradır.
Qarşı tərəfin mövqeyini dərc etməyə hazırıq.
