Şabran rayonunda məktəb ərazisinin zibilliyə çevrilməsi şagirdlərin valideynlərində narahatlıq doğurur.
Bu barədə Shimal.News-a müraciət edən sakinlər bildiriblər ki, şəhid Samir Zülfüqarovun adını daşıyan 3 nömrəli tam orta məktəbin ətrafı acınacaqlı vəziyyətdədir.
Cəlil Məmmədquluzadə küçəsində yerləşən təhsil ocağının həyətinə məişət tullantıları atılaraq qalaqlanır:
“Sakinlər zibili ətrafa atmaq istəmirlər, lakin yaxınlıqda tullantı konteynerlərinin olmaması onları belə addım atmağa məcbur edir. Məsələ ilə bağlı aidiyyəti qurumlara dəfələrlə müraciət edilsə də, heç bir nəticə əldə olunmayıb”,- deyən yerli sakinlər və valideynlər problemin işıqlandırılmasını və tədbirlər görməsinin vacibliyini vurğulayıblar.
Ümid edirik ki, məsələ tezliklə həllini tapacaq, məktəb və onun ətrafı təmiz və təhlükəsiz mühitə qovuşacaqdır.
