Güclü sel Şabran rayonu ərazisində evlərə, təsərrüfatlara, mal-qaraya və əkin sahələrinə böyük ziyan vurub.
Shimal.News-un əldə etdiyi məlumata görə, Şabran Rayon İcra Hakimiyyəti, "Azərişıq", "Azəriqaz", "Azərsu" ASC-lər və digər aidiyyəti qurumların əməkdaşları səfərbər olunub.
Məsələ ilə bağlı açıqlama verən Şabran Rayon İcra Hakimiyyətinin səlahiyyətli nümayəndəsi Orxan Kərimov bildirib ki, hazırda fəsadların aradan qaldırılması istiqamətində işlər davam etdirilir.
Zərər dəymiş ərazilər sırasında Borbor, Düzbilici, Xəlifələr və Əmirxanlı kəndləri xüsusilə qeyd olunur. İnsanlara dəymiş ziyanın miqyası müəyyənləşdirilir, faktlar araşdırılaraq qeydə alınır. Eyni zamanda, selin dağıtdığı yollar və yararsız hala düşmüş körpülərin bərpası istiqamətində intensiv işlər aparılır. Kəndlərə nəqliyyatın bərpa edilməsi həyata keçirilir.
Sosial şəbəkələrdə yayılan görüntü və məlumatlar da fəlakətin miqyasını bir daha göstərir. Rəsmi qurumlar və FHN vətəndaşlara müraciət edərək təhlükəsizlik qaydalarına ciddi əməl olunmasını tövsiyə ediblər.
