Rayon Polis Şöbələrinin təşkilatçılığı ilə Şabran və Xaçmazda yerləşən ümumtəhsil müəssisələrinin pedaqoji kollektivi ilə görüş keçirilib.
Shimal.News xəbər verir ki, Rayonun 5 saylı tam orta məktəbində baş tutan görüşdə RPŞ-nin əməkdaşları, regional təhsil idarəsinin əməkdaşları və pedaqoji kollektiv iştirak edib.
Tədbirdə yeniyetmələrlə iş, şagirdlərin davranış qaydalarına riayət etməsi, dərs prosesindən üzrsüz səbəblərlə yayınması, eləcə də valideynlərin övladlarını təhsildən yayındırması hallarının qarşısının alınması və bu sahədə ailə-məktəb-polis əməkdaşlığının əhəmiyyəti vurğulanıb.
Məktəb ərazilərinə kəsici-deşici alətlərin, qanunla qadağan edilmiş digər əşyaların gətirilməsi, yeniyetmələrin hüquqazidd davranışlardan çəkindirilməsi və bu istiqamətdə polis əməkdaşları ilə qarşılıqlı əməkdaşlığın gücləndirilməsi, eləcə də pedaqoji kollektivi narahat edən digər məsələlər müzakirə edilib.
Daha sonra iştirakçılara erkən nikah hallarının qarşısının alınması, eləcə də şagirdlərin internet resurslarından, xüsusilə sosial şəbəkələrdən təhlükəsiz və düzgün istifadə qaydaları barədə də ətraflı məlumat verilib.
Görüşün sonunda səsləndirilən mövzularla bağlı fikir mübadiləsi aparılıb.
