Şabran şəhər sakini Günəşov Ruslan Bəydadaş oğlu ünvanlı dövlət sosial yardımı ala bilmədiyi üçün şikayətçidir.
Üç azyaşlı övladı olan vətəndaş Shimal.News-a bildirib ki, o, sosial yardım almaq məqsədilə Əmək və Əhalinin Sosial Müdafiəsi Nazirliyinə müraciət edib. Lakin ona imtina cavabı verilib. Səbəb kimi isə qaz sayğacında problem olduğu göstərilib.
Ancaq Ruslan Günəşov bildirir ki, sayğacında heç bir problem yoxdur. Daha maraqlısı isə odur ki, o, bundan öncəki illərdə məhz həmin sayğacla sosial yardım alıb. Əgər o zaman problem yox idisə, indi necə ortaya çıxdı? Eyni sistemlə işləyən sayğacın birdən-birə "uyğunsuz" elan edilməsi nə qədər məntiqə uyğundur?
Bu kimi hallar təkcə Ruslan Günəşovun deyil, ölkənin bir çox aztəminatlı vətəndaşının qarşılaşdığı problemlərdən biridir. Dövlətin aztəminatlı ailələrə dəstək məqsədilə ayırdığı sosial yardımların bəzi məmurlar tərəfindən əsassız bəhanələrlə verilməməsi, həmin ailələrin vəziyyətini daha da çətinləşdirir. Sual yaranır: əgər sayğac indiyə qədər problem yaratmayıbsa, indi niyə əsas maneəyə çevrilib?
Sosial yardım aztəminatlı ailələr üçün mühüm dəstək mexanizmidir. Onların hüquqlarının məmur bürokratiyasına qurban verilməsi isə sosial siyasətin mahiyyətinə ziddir. Əmək və Əhalinin Sosial Müdafiəsi Nazirliyi bu cür şikayətləri diqqətlə araşdırmalı, əsassız imtinaların qarşısını almalıdır. Əks halda, dövlətin aztəminatlı ailələrə dəstəyi yalnız kağız üzərində qalacaq.
