Bu gün cüdo üzrə dünya və Avropa çempionu olan Fərhad Rəcəblinin ad günüdür.
Shimal.News xəbər verir ki, o, 1959-cu il oktyabrın 11-də Qusar rayonunun Əcəxur kəndində dünyaya göz açıb. 1971-ci ildən idmanla məşğul olmağa başlayan Fərhad Rəcəblinin sözlərinə görə, idmana qardaşları sayəsində gəlib:
“İdmana gəlməyim böyük qardaşlarım Əhmədin və Məmmədin sayəsində oldu. Yadıma gəlir ki, həmişə onların məşqlərini və yarışlarını izləməyə gedir, qardaşlarıma azarkeşlik edirdim. Qeyd etdiyim kimi, idmana olan həvəsim mənim bu sahəni seçməyimlə nəticələndi. Əvvəllər qardaşlarımın tövsiyəsi ilə sərbəst güləşlə məşğul olurdum. Lakin 3-4 aydan sonra sambo ilə maraqlanmağa başladım. 1 il sambo ilə məşğul olduqdan sonra cüdoya üz tutdum. Ailədə 4 qardaş olmuşuq və hamımız idmanla məşğul idik”.
Onu da qeyd edək ki, Azərbaycan idman tarixinə öz adını qızıl hərflərlə yazan idmançımız veteranlar arasında 12 dəfə dünya və 10 dəfə Avropa çempionu, dəfələrlə Azərbaycan çempionu olub, həmçinin dəfələrlə Avropa və SSRİ-də müxtəlif titullar qazanıb.
