26 İyun – Silahlı Qüvvələr Günü münasibətilə Qusar rayonunun Hil kəndində şəhidlərin əziz xatirəsinə həsr olunmuş Şəhidlər Bulağının açılış mərasimi keçirilib.
Shimal.News-un məlumatına görə, tədbirdə şəhid ailələri, kəndin ağsaqqalları, din xadimləri, Hil kənd inzibati ərazi dairəsi üzrə nümayəndəlik və bələdiyyə nümayəndələri, eləcə də yerli sakinlər iştirak ediblər. Açılış mərasimi şəhidlərin ruhuna duaların oxunması ilə başlayıb.
Çıxış edənlər bildiriblər ki, bulaq şəhidlərin vətən uğrunda göstərdiyi qəhrəmanlığın unudulmaz simvoludur və bu kimi təşəbbüslər gələcək nəsillərə tariximizi yaşatmaq baxımından mühüm əhəmiyyət kəsb edir. Qeyd olunub ki, şəhid ailələrinin yanında olmaq, onların qayğılarını paylaşmaq hər birimizin borcudur.
Hil kəndində istifadəyə verilən bu bulaq sadəcə su mənbəyi deyil — o, vətənə can verən igidlərin xatirəsinə ehtiramın canlı nümunəsidir.
