Cibir kəndi Qusar rayonunun şimal-qərbində, Piral inzibati ərazisində, dağətəyi düzənlikdə yerləşir.
Bəzi məlumatlara görə, kənd Dağıstanın (Rusiya) Axtı rayonundakı Çeper (Caba) kəndindən köçən ailələrin məskunlaşması nəticəsində yaranıb. Sakinlər yeni yaşayış məntəqəsinə öz köhnə adını verib. Digər məlumatlara görə, yerli əhali kəndə “Cibir” - “Чи пIиp” (ləzgi dilindən “bizim pirimiz”) adını veriblər.
Kənd indiki yerində təxminən 400 il əvvəl salınıb. Ehtimal olunur ki, Cibir kəndi dörd dəfə yerini dəyişib. Əhalinin tez-tez köçmə məcburiyyəti düşmənlərin hücumları və təbii fəlakətlərin baş verməsi ilə əlaqəli idi.
XVIII əsrdə Cibir Quba əyalətinin böyük kəndlərindən idi və burada kənd təsərrüfatını inkişaf etdirməkdən ötrü əlverişli şərait var idi. Dərbəndə gedən dəvə karvanları buradan keçirdi. Həmin yol indi də “Dəvə yolu” adlanır.
1885-1903-cü illərdə burada dünyəvi məktəb fəaliyyət göstərib. 1929-1930-cu illərdə isə bu kənddə kolxozlar (kollektiv təsərrüfatlar) yaradılıb.
Kənd qədimdən öz bağları və zəmiləri ilə məşhur olub. Sovet dövrünün ilk illərində burada 2000 hektara yaxın taxıl zəmisi var idi. Burada başqa alma növləri ilə bərabər, “Cibir alması” və 50-dən çox armud növü becərilir. Həmçinin hər bağda armud qurutmaq üçün xüsusi təndirlər var idi.
Kəndin məşhur nəsilləri Abdullahlar, Hesenar, Bardiyar, Kullarar, Teverar, Exterar sayılır. Əhali, əsasən, heyvandarlıq, əkinçilik, bağçılıq və bostançılıqla məşğul olur.
1915-ci ildə olan “Qafqaz təqvimi”ndə əhalinin siyahıyaalınması məlumatına əsasən, Cibir kəndində 1299 nəfər yaşayırdı. 2018-ci ildə əhalinin sayı 1300 nəfər olub.
İstinad edilən mənbələr:
