Qusar rayon İcra Hakimiyyətində “Yerli İcra Hakimiyyətləri haqqında Əsasnamə”nin 3.1.4-cü bəndinə uyğun olaraq rayon ərazisində fəaliyyət göstərən yerli özünüidarəetmə qurumu olan bələdiyyələrlə qarşılıqlı fəaliyyəti təmin etmək üçün Xaçmaz Regional Ədliyyə İdarəsi və Rayon İcra Hakimiyyətinin birgə təşkilatçılığı ilə treninq keçirilib.
Shimal.News xəbər verir ki, iştirakçılar yerli özünüidarəetmənin mahiyyətinə uyğun olaraq yerli əhali ilə sıx təmasın təşkili, bələdiyyələrin fəaliyyəti barədə əhalinin mütəmadi məlumatlandırılmasının əhəmiyyətini qeyd ediblər.
Treninqdə bələdiyyə büdcəsinin formalaşdırılması, gəlir və xərclərin uçotu, vergi qanunvericiliyinin icrası, bələdiyyələr tərəfindən vergilərin hesablanması, yığılması və hesabatların təqdim edilməsi, bələdiyyələr haqqında Azərbaycan Respublikası qanunlarının tətbiqi vəziyyəti, əmək qanunvericiliyi, bələdiyyə əmlakının idarə edilməsi, onların fəaliyyəti zamanı yol verilən hüquqpozmalar, bələdiyyələrin ümumi fəaliyyət istiqamətləri ilə bağlı müzakirələr aparılıb, iştirakçıları maraqlandıran suallara aydınlıq gətirilib.
