Qusar şəhərində 1974-cü il təvəllüdlü Adil şəxsi münasibətlər zəminində yaranan mübahisə zamanı tanışı Şükürə xəsarət yetirib.
Demokrat.аz-ın məlumatına görə, Adil 2023-cü il iyulun 7-si, saat 19 radələrində Qusar şəhəri, M.Həsrətov küçəsində kafenin qarşısında sərxoş vəziyyətdə tanışı Mahirə sataşaraq onun ünvanına nalayiq ifadələr işlədərək təhqir edib və döyüb. Mahir qeyd olunan məsələ ilə bağlı qardaşı Şükürə məlumat verib.
O da məsələyə aydınlıq gətirmək üçün həmin gün saat 23 radələrində Adilin yaşadığı evin qarşısına gəlib. Şükür qardaşına qarşı etdiyi hərəkətlərə görə öz iradını bildirən zaman Adillə əlbəyaxa olublar.
Daha sonra isə Adil yaşadığı evin yataq otağından özünə məxsus qatlanan bıçağı götürüb və Şükürün üstünə hücum edib. Əlindəki bıçaqla onun qarın nahiyəsinə bir dəfə vurub.
Hadisəni törədən şəxs barəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham elan edilib.
Bu cinayət işinə Sumqayıt Ağır Cinayətlər Məhkəməsində baxılıb. Məhkəmənin hökmü ilə Adil 5 il müddətinə azadlıqdan məhrum edilib.
Hökmdən narazı qalan təqsirləndirilən şəxs apellyasiya şikayəti verib. O, barəsində olan cinayət əməlinin sübuta yetirilmədiyini əsas gətirib və barəsində olan cinayət təqibinə xitam verilməsini istəyib.
Sumqayıt Apellyasiya Məhkəməsinin qərarı ilə onun şikayəti təmin olunmayıb.
