Qusar rayonunun kənd sakini, 1999-cu il təvəllüdlü Afət şəxsi münasibətlər zəminində qonşusu Nərminə (adlar şərtidir - red.) ilə mübahisə edib. Mübahisə zamanı Afət onu saçından tutaraq dartıb, başına əl ilə zərbələr endirib və başını yerə vuraraq müxtəlif dərəcəli bədən xəsarətləri yetirib.
Demokrat.az-ın məlumatına görə, hadisə ilə bağlı Afət barəsində Cinayət Məcəlləsinin 128-ci maddəsi (qəsdən sağlamlığa yüngül zərər vurma) ilə cinayət işi açılıb.
Təqsirləndirilən şəxs istintaqa verdiyi izahatda özünü təqsirli bildiyini qeyd edib. O, ifadəsində bildirib ki, zərərçəkmiş şəxsi əvvəllər tanımayıb:
“Nərminənin mənim barəmdə nalayiq ifadələr işlətdiyini, əxlaqsızlıqda ittiham etdiyini eşitmişəm. Bu barədə həyat yoldaşım Sadiqə deyib. Hadisə günü, saat 17:45-də əsəbləşərək onun evinə getdim. Ondan bu sözləri niyə dediyini soruşdum və əsəbi olduğum üçün saçından dartıb, başına zərbə vurdum, sonra başını tutaraq yerə vurdum, ona xəsarət yetirdim”.
Cinayət işinə Qusar Rayon Məhkəməsində baxılıb. Məhkəmənin hökmü ilə Afət 6 ay müddətinə azadlığın məhdudlaşdırılması cəzasına məhkum edilib.
Məhkəmənin qərarına əsasən, təqsirləndirilən şəxs cəza müddətində yaşadığı evi axşam saat 21:00-dan səhər saat 07:00-dək tərk etməməlidir. Ona həmçinin elektron nəzarət vasitəsi gəzdirmək və onun işlək vəziyyətdə saxlanmasına xidmət etmək öhdəliyi qoyulub.
Bundan başqa, cəza müddətində Afətin Qusar rayonunun ərazisini tərk etməsi, məhkəmə qərarı olmadan yaşayış yerini dəyişməsi, həmçinin iş yerini dəyişdikdə bu barədə nəzarət orqanını əvvəlcədən məlumatlandırması qadağan olunub.
