Qusarda keçirilən “Oxu bayramı”nda 124 adda müxtəlif mövzular və dillərdə kitablar, yeni nəşrlər sərgilənib.
AZƏRTAC-ın məlumatına görə, Ulu Öndər Heydər Əliyevin anadan olmasının 102-ci ildönümünə həsr olunan tədbirdə “Əbədiyaşar Lider”, “Bir ömrün salnaməsi”, “Qələbəyə aparan lider İlham Əliyev”, “Mirzə Qədim İrəvani-200”, “Seyid Əzim Şirvani-190”, “ Üzeyir Hacıbəyli-140”, “Maqsud İbrahimbəyov-90”, “2025-ci il Konstitusiya və Suverenlik ilidir. Müstəqilliyimiz əbədidir”, “Azərbaycan Yurdum mənim”, “Yeni kitablar”, “Qədim yurd yerimiz - Qərbi Azərbaycan” və başqa mövzularda stendlər nümayiş olunub.
Nəriman Nərimanov adına Mərkəzi istirahət parkında keçirilən “Oxu bayramı”na mindən çox yerli sakin və turistlər qatılıb.
Tədbirdə çıxış edən natiqlər Ümummilli Lider Heydər Əliyevin dövlətçilik tariximizdəki əvəzsiz rolundan, onun milli-mənəvi dəyərlərin qorunması və gənclərin intellektual inkişafına verdiyi töhfələrdən bəhs ediblər. Qeyd olunub ki, Ulu Öndər hər zaman elmə, biliyə və kitaba yüksək qiymət verib, cəmiyyətin tərəqqisini savadlı və maarifli insan kapitalının formalaşdırılmasında görüb.
Çıxışlar zamanı gənclərdə analitik təfəkkürün, tədqiqat marağının, bədii zövqün inkişaf etdirilməsi istiqamətində kitabxanaların və mədəniyyət ocaqlarının rolu da xüsusi vurğulanıb. Bildirilib ki, "Oxu bayramı" kimi layihələr bu baxımdan mühüm platformadır və gələcəkdə bu tədbirlərin daha geniş miqyasda təşkili vacibdir.
“Oxu bayramı”nda fəal oxucular diplomlarla təltif olunub, yerli sənətçilərin ifasında musiqi nömrələri səsləndirilib, rəqs kollektivləri tərəfindən milli rəqs nümunələri təqdim edilib.
