Qusarda qadınlar arasında saçyoldu olub.
Shimal.News-un məlumatına görə, məhkəmənin istintaqı Qusar Rayon Məhkəməsində keçirilib.
Belə ki, təqsirləndirilən 1999-cu il təvəllüdlü Günel Verdiyeva (ad şərtidir) zərərçəkmiş Sevinc Osmanovanın (ad şərtidir) həyətinə daxil olaraq üstünə hücum edib. Onun saçını yolub, yerə yıxdıqdan sonra başını dəfələrlə yerə vurub.
Günel Verdiyeva Azərbaycan Respublikasının CM-nin 128-ci (sağlamlığa zərbə vurma) maddəsi ilə təqsirləndirilib.
Məhkəmədə ifadə verən Günel Verdiyeva qeyd edib ki, Sevinci əvvəllər tanımayıb:
“Onu əvvəllər tanımırdım. Sevinc məni söydüyünü, mənim barədə əxlaqsız hərəkətlər etdiyimi deyib. Bunu da mənə həyat yoldaşım Elşad dedi. O, bu barədə kənddə eşidib. Qadının dediyi sözlərə görə, evinə gedərək səbəbini soruşdum. Əlbəyaxa davaya çıxdıq”.
Zərərçəkmiş Sevinc Osmanova ifadəsində bildirib ki, qapını açan kimi Günel onu vurmağa başlayıb:
“Yaşadığımız kəndə 1 ildir ki, gəldiyim üçün onu tanımıram. Hadisə günü qapı döyüldü, açan zaman Günel üstümə hücum çəkdi. Macal tapıb soruşa bilmədim. Məni dəhşətli döyməyə başladı”.
Sonda məhkəmənin qərarı ilə təqsirləndirilən şəxs, 6 ay müddətə azadlığın məhdudlaşdırılması (elektron qolbaq) cəzasına məhkum edilib.
Fidan İlqar
