Qusar rayonunda 44 günlük Vətən müharibəsi şəhidlərimizin anım mərasimi keçirilib.
Shimal.News xəbər verir ki, mərasim iştirakçıları Əniq kəndində şəhidlərimiz Sərraf Murtuzəli oğlu İmaməliyev və Amrid Zaur oğlu Yunusovun məzarları önünə gül dəstələri düzüb, ruhlarına dualar oxuyaraq xatirələrini ehtiramla yad ediblər.
Məlumat üçün bildirək ki, leytenant Sərraf İmaməliyev II Qarabağ müharibəsi zamanı Füzulinin, Qubadlının və Şuşanın azadlığı uğrunda gedən döyüşlərdə savaşıb, noyabrın 7-də Şuşa döyüşləri zamanı şəhid olub. Ölümündən sonra “Füzulinin azad olunmasına görə medalı”, “Qubadlının azad olunmasına görə medalı”, “Vətən uğrunda medalı”, “Hərbi xidmətlərə görə medalı” ilə təltif olunub.
Çavuş Amrid Zaur oğlu Yunusov Hadrut qəsəbəsinin və Füzulinin azadlığı uğrunda gedən döyüşlərə qatılıb, oktyabrın 28-də Füzuli döyüşləri zamanı şəhid olub. Döyüşlərdə göstərdiyi şücaətlərinə görə ölümündən sonra “Cəsur döyüşçü medalı”, “Vətən uğrunda medalı”, “Xocavəndin azad olunmasına görə medalı”, “Füzulinin azad olunmasına görə medalı” ilə təltif edilib.
Allah bütün şəhidlərimizə rəhmət eləsin!
