Qusarda doğuşdan sonra həyatını itirən ana ilə bağlı Tibbi Ərazi Bölmələrini İdarəetmə Birliyindən (TƏBİB) AÇIQLAMA:
“11.08.2025-ci il tarixində 38-39 həftəlik hamilə qadın Qusar Rayon Mərkəzi Xəstəxanasının Doğum şöbəsinə müraciət edib.
1994-cü il təvəllüdlü şəxsə zəruri laborator və instrumental xidmətlər göstərilib və qeysəriyyə kəsiyi əməliyyatına zərurət yarandığı bildirilib.
Əməliyyatdan sonra pasiyentdə ağciyər arteriyasının tromboemboliyası, ağciyər, qara ciyər, böyrək və ürək çatışmazlığı, eyni zamanda tromboz (qan laxtalanması) müşahidə olunduğundan müalicəsi Reanimasiya şöbəsində davam etdirilib.
12.08.2025-ci il tarixində saat 08:30 radələrində vəziyyəti pisləşən pasiyentdə ürək döyüntüləri müşahidə edilməyib. Dərhal zəruri tibbi xidmətlər göstərilib və pasiyentin ürək fəaliyyəti bərpa edilib. Daha sonra ixtisaslı həkim-mütəxəssis baxışı həyata keçirilib və sağlamlıq vəziyyəti yenidən qiymətləndirilib.
Pasiyentin vəziyyəti gecə saatlarında təkrar pisləşib və həkimlərin çoxsaylı səylərinə baxmayaraq, 12.08.2025-ci il tarixində, saat 23:40 radələrində şəxsin ölüm faktı qeydə alınıb.
Meyit təşrih üçün Məhkəmə-Tibbi Ekspertiza və Patoloji Anatomiya Birliyinin Qusar rayon şöbəsinə təhvil verilib.
Qeyd edək ki, qadının qeysəriyyə kəsiyi əməliyyatı ilə boyu 49 sm., çəkisi 3 kq. 100 qram olan qız övladı dünyaya gəlib. Körpəyə zəruri tibbi xidmətlər göstərilib. Vəziyyəti qənaətbəxş hesab olunan körpənin müalicəsi Doğum şöbəsində davam etdirilir”.
10:40
Qusarda gənc ana doğuşdan sonra ölüb
Qusar rayonu Balaqusar kənd sakini 33 yaşlı Yasəmən Firuddin qızı Ədilova dunyasını dəyişib.
Shimal.News-un əldə etdiyi məlumata görə, Rayon Mərkəzi Xəstəxanasında qeysəriyyə yolu
doğuş əməliyyatı həyata keçirilib.
Mərhumun yaxınları bildirir ki, hadisə əməliyyat keçirən həkimin səhlənkarlığı nəticəsində baş verib, mərhumun damarı kəsilib və çoxlu qan itkisi baş verib. Həkimlərin rəyində isə səbəb ürək klapanına laxta qan getməsi göstərilib.
Dünyaya gələn qız uşağının həyatını xilas etmək mümkün olub. Onun səhhətinin yaxşı olduğu bildirilir.
