Bir müddətdir Qusar rayonunda yerləşən yanacaq doldurma məntəqələrində (YDM) benzin çatışmazlığının yaşandığı deyilir.
AzPolitika.info-nun məlumatına görə, bir qrup yerli sakin YDM-lərdə “Aİ-92” markalı benzinin tapılmadığından şikayət ediblər:
“Bizim rayonda 3 yanacaq doldurma məntəqəsi var. Artıq 1 aya yaxındır ki, “Aİ-92” markalı benzin məhdudiyyətlə satılır. İki YDM artıq benzinsiz qalıb, 1 YDM-də isə benzin bitmək üzrədir. Bölgədəki digər kiçik YDM-lərdə də belə problemlər var”, - deyə müraciətdə bildirilir.
Məsələ ilə bağlı Qusar rayon İcra Hakimiyyətinin Sosial-iqtisadi inkişafın təhlili və proqnozlaşdırılması şöbəsi müdirinin müavini İkram Tumarxanov açıqlma verib. O bildirib ki, hazırda rayondakı yanacaq doldurma məntəqələrində “Aİ-92” markalı benzinin satışı ilə bağlı problem yaşanmır:
“Hazırda rayon mərkəzində, Avtovağzal kompleksinin yaxınlığına yerləşən bir YDM-də qismən belə bir problem var. Ancaq digər - “SOCAR” və “Azpetrol”-a məxsus YDM-lərdə benzinin satışı ilə bağlı problem yaşanmır. Biz özümüz də gündəlik olaraq bu məntəqələrdən istifadə edirik”.
