Qusar rayonunda 40 yaşlı Kamal ailə münaqişəsi zəminində 31 yaşlı həyat yoldaşı Turanəyə (adlar şərtidir – red.) xəsarət yetirib.
Demokrat.az-ın məlumatına görə, hadisə həmin şəxslərin birgə yaşadığı evdə, saat 8:00 radələrində baş verib.
Kamal barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib. O, ifadəsində özünü təqsirli bilib:
“Hadisə baş verən gün havanın soyuq, uşaqların da azyaşlı olduğunu nəzərə alıb Turanəyə dedim ki, işə getməsin. Bununla bağlı aramızda mübahisə yarandı. Mən əsəbiləşərək yumruqla Turanəni vurdum. Hazırda törətdiyim əməlindən səmimi peşmançılıq hissi keçirirəm”.
Turanə iş üzrə zərərçəkmiş qismində ifadə verib:
“Kamal tez-tez mənimlə mübahisə edir, evə əsəbi halda gəlir və evdə dava salır. Buna görə bir neçə dəfə valideynlərimin evinə qayıtdım. Hadisə günü ərimə hovuzda su olmadığını, çəni doldurmaq lazım olduğunu bildirdim. O isə yumruqla vuraraq mənə xəsarət yetirdi. Bundan sonra biz bir həftə küsülü olduq”.
Qusar Rayon Məhkəməsində təqsirləndirilən şəxsin zərərçəkmişlə barışması, zərərçəkmiş şəxsin şikayətçi olmaması nəzərə alınıb. Kamalın barəsində olan cinayət təqibinə xitam verilib. O, cinayət məsuliyyətindən azad edilib.
