Yeni ilə sayılı günlər qalsa da, Qusar bazarında durğunluq müşahidə olunur. Piştaxtalar məhsulla dolu olsa da, alan da, satan da məhsulların baha olduğundan gileylənir.
Shimal.News xəbər verir ki, mövcud vəziyyət satıcılarla yanaşı alıcıların da narazılığına səbəb olub. Çünki artıq bəzi kənd təsərrüfatı məhsullarının qiymətində artım hiss edilir.
Satıcıların sözlərinə görə, son illərdə rayonda iri marketlər istifadəyə verildikdən sonra alış-veriş üçün bazara üz tutanların sayı xeyli azalıb.
Satıcı Xanım Ağayeva bildirir ki, hazırda alıcılara 1 kq naringi 1 manat 50 qəpiyə, pomidoru 3 manata, narı 2 manata, kənd yumurtasını isə 45 qəpiyə təklif edir. O, alıcıların olmamasını hələ ki, şimal bölgəsində təqaüd və müavinətlərin ödənilməməsi ilə əlaqələndirir.
Bayram süfrəsinə qoyulan şirniyyatların hazırlanmasında əsasən qoz, fındıq istifadə edilir. Hazırda Qusar bazarında 1 kq qoz ləpəsinin qiyməti alıcılara 15-20 manata satılır. Fındıq ləpəsinin qiyməti də eynilik təşkil edir. Satıcı Roza Həmzətova son günlərdə bu məhsulların 3-4 manat bahalaşdığını bildirir.
Bazarda qiyməti əl yandıran məhsullardan biri də xiyardır. 1 kq xiyarın qiyməti 4-5 manat arasında dəyişir. Pomidor 2 manat 50 qəpiyə, acı bibər 5 manata satılır. Kartof-soğanın isə 1 kq-ı 80 qəpiyə almaq mümkündür.
Bayramla əlaqədar tələbat artan məhsullardan biri də hind quşlarıdır. Qusar bazarında hind quşlarının 1kq-ı 15-17 manata təklif olunur. Diri hind quşu almaq üçün isə nə az nə çox, 50 manat xərcləmək lazımdır. Mal ətinin kiloqramı 15 manata, quzu əti isə 19 manata təklif edilir. Satıcılar bildirir ki, rayona gələn turistlər bazara baş çəkəndə onların da alveri yaxşı olur.
Dekabrın son günlərində bazarda canlanma olacağı gözlənilir.
