Qusarın Aşağı Ləgər kənd tam orta məktəbində polis əməkdaşları maarifləndirici görüş keçiriblər.
Shimal.News-a Daxili İşlər Nazirliyinin Mətbuat Xidmətinin Quba regional qrupundan verilən məlumata görə, tədbirdə polis əməkdaşları, məktəbin pedaqoji heyəti, eləcə də yuxarı sinif şagirdləri iştirak ediblər.
Tədbirdə çıxış edən RPŞ-nin rəisinin əməliyyat işləri üzrə müavini, polis polkovniki Ceyhun Osmanov Daxili İşlər Nazirliyinin Polis Akademiyası barədə şagirdlərə ətraflı məlumat verərək, təhsil müəssisəsinin yaranma tarixi, inkişafı, ölkəmizdə hüquq elminin inkişafına verdiyi töhfələr, daxili işlər orqanlarının ali təhsilli hüquqşünaslarla təmin olunmasındakı fəaliyyətindən danışıb.
Daha sonra “Narkomaniyaya yox deyək” mövzusunda çıxış edən RPŞ-nin digər əməkdaşı Ruslan Hüseynov narkotik vasitələrin insanlar üçün yaratdığı problemlərdən danışıb və narkomaniyanın cəmiyyətin problemi olduğunu qeyd edib.
Görüşdə həmçinin erkən nikahın fəsadlarından da bəhs olunub.
Yekunda mövzular ətrafında məktəblilərin sualları cavablandırılıb.
