Bu gün Cibir kənd tam orta məktəbinin sosial şəbəkə hesabında paylaşılan bir neçə şəkil qarşıma çıxdı. Deyəsən, rəhbərlik vəziyyəti gizlətmək əvəzinə, olduğu kimi göstərməyə qərar verib. Cəsarətə görə təşəkkür düşür, amma…
XXI əsrdir. Texnologiyalar inkişaf edir, dünya süni intellektdən, gen mühəndisliyindən danışır. Bəs biz? Biz hələ də soyuq sinif otaqlarında, qalın gödəkcələrlə oturan şagirdlər görürük. Sinif divarları dağılıb, aforizmlər belə rəngini itirib. Yəqin ki, illər əvvəl yazılıb və bir daha dəyişilməyib. Ən ironik olan isə, bu şəraitdə müəllimin reproduktiv sağlamlıq haqqında danışmasıdır. Axı icbarı sağlamlıq şərtlərinin belə qorunmadığı bir yerdə, sağlamlıqdan bəhs etməyin nə mənası var?
Hər il dövlət milyonlarla manat ayırır – məktəblər tikilir, təmir olunur. Amma belə görüntülər hələ də var. Bəs pullar hara gedir? Bəlkə kağız üzərində məktəb çoxdan təmir olunub?
Gələcək savadlı gənclər üzərində qurulur, amma əvvəlcə o gənclərə normal təhsil mühiti yaratmaq lazımdır. Uşaq soyuqdan əllərini cibində gizlədibsə, sinifdə nəfəsi ilə üşüyən pəncərə şüşəsini isitmək istəyirsə, hansı biliyə fokuslana bilər?
Mən bu yazını yazıb bitirəcəyəm, amma o şagirdlər sabah da eyni şəraitdə dərsə gedəcəklər. Hələ ki bu vəziyyəti "görməyən" aidiyyəti qurumlar isə ümid edirəm tezliklə gözlərini açacaqlar...
Davud Maqsudov
