Quba-Xaçmaz magistral yolunun Zərdabi qəsəbəsindən keçən hissəsində ötən il əkilmiş minlərlə həmişəyaşıl ağacın qısa müddətdə quruması və ərazidən yığışdırılması sakinlərin narazılığına səbəb olub.
Shimal.News xəbər verir ki, ötən ilin "Yaşıl dünya naminə həmrəylik ili" elan olunması ilə əlaqədar Quba Rayon İcra Hakimiyyətinin təşkilatçılığı ilə 18 oktyabr 2024-cü il tarixində keçirilən genişmiqyaslı ağacəkmə aksiyasında yüzlərlə insan iştirak edib.
Lakin redaksiyamıza daxil olan şikayətdə bildirilir ki, əkilən həmişəyaşıl ağaclar cəmi bir neçə ay sonra quruyublar və hazırda ərazidən çıxarılır.
Sakinlər ağacların əkilməsi üçün torpaq işlərinin aparılması, tinqlərin alınması və digər xərclərin dövlət büdcəsinə ağır yük olduğunu vurğulayaraq, bu cür layihələrin daha düşünülmüş və planlı şəkildə həyata keçirilməsinin vacibliyini qeyd edirlər.
Quru iqlim şəraitində həmişəyaşıl ağacların xüsusi qulluq tələb etməsi, suvarma işlərinin lazımi səviyyədə aparılmaması və ya ağac növlərinin ərazinin torpaq-iqlim xüsusiyyətlərinə uyğun seçilməməsi kimi səbəblərin bu nəticəyə gətirib çıxara biləcəyi ehtimal olunur.
