Quba rayonundan keçən Qudyalçay ekoloji çirklənməyə məruz qalır.
Shimal.News -a edilən müraciətdə bildirilib ki, rayonun Alekseyevka və Zizik kəndlərinin zibili çay yatağına atılır.
Uzun müddət çay yatağına atılan tullantılar təmizlənmədiyi üçün qalaqlanaraq ərazidə antisanitar vəziyyət yaradıb:
"Çay yatağında iyrənc mənzərə meydana gəlib. Yerli bələdiyyə, icra nümayəndəliyi, Quba rayon İcra Hakimiyyəti və Dövlət Ekoloji Təhlükəsizlik Xidməti bu "mənzərə"ni görməzdən gəlir" - deyə şikayətçilər bildiriblər.
Ekoloji çirklənmənin qarşısının alınması üçün təcili tədbirlər görülməsinin vacib olduğunu vurğulayan sakinlər aidiyyəti qurumlardan təmizlik işlərinin aparılmasını və tullantıların düzgün idarə olunmasını tələb edirlər.
