Quba rayonunun Dəlləkli kəndində vəziyyət dözülməz həddə çatıb.
Shimal.News -a yazan sakinlər uzun müddətdir zibil içində yaşadıqlarını qeyd edirlər. Kənddə nə zibil qutusu var, nə də tullantılar üçün xüsusi yer ayrılıb. Nəticədə, insanlar zibillərini hara gəldi, ən çox da Qudyalçayın sahilinə və çay yatağına atırlar.
Sakinlərin sözlərinə görə, çayın sahili zibil poliqonuna dönüb, iy-qoxu isə həddindən artıq dözülməzdir. Çaya atılan tullantılar ekologiyanı çirkləndirir, ətraf mühiti məhv edir. Quba kimi turistik bir bölgədə belə bir mənzərəni təsəvvür etmək çətindir, amma Dəlləklidə bu, acı reallıqdır.
Quba rayon icra hakimiyyəti, yerli icra nümayəndəliyi, bələdiyyə və Dövlət Ekoloji Təhlükəsizlik Xidməti problemi görməzdən gəlir.
Sakinlər aidiyyəti qurumlardan konkret addımlar atmağı, zibil qutularının yerləşdirilməsini, tullantıların vaxtında daşınmasını və ekoloji təhlükənin aradan qaldırılmasını tələb edirlər.
