On iki gün əvvəl yağan güclü yağışlar nəticəsində Quba rayonunun Dərk, Talış və bir sıra kəndlərində baş verən selin yaratdığı fəsadlar hələ də tam bərpa olunmayıb.
Shimal.News-a daxil olan məlumata görə, yaşayış məntəqələrinin yolları yararsız hala düşüb. Sakinlər nəqliyyatda ciddi çətinliklərlə üzləşirlər.
Hazırda kəndlilər gündəlik hərəkətlərini təmin etmək üçün yük maşınları vasitəsilə çayı keçməyə məcbur olurlar. Bu isə onların dediyinə görə təhlükəlidir.
Bundan əlavə, kəndlərdə günlərdir elektrik enerjisi və internet xidməti yoxdur. Sakinlər deyirlər ki, bu vəziyyət onların gündəlik həyatını iflic edib, xüsusilə təhsil və iş prosesində ciddi problemlər yaşanır.
Kənd sakinləri aidiyyəti qurumların məsələyə biganə yanaşdığından şikayətlənirlər. Onların sözlərinə görə, fəsadların aradan qaldırılması istiqamətində ciddi iş görülmür və verdikləri şikayətlərə lazımi reaksiya verilmir.
Sakinlər problemin tezliklə həll olunması, yolların bərpası, işıq və internet təminatının bərpa edilməsi üçün rəsmi qurumlardan təcili tədbirlər görməyi tələb edirlər.
View this post on Instagram
