Dəvədabanı yaşayış məntəqəsinin giriş hissəsindən Quba şəhərinə möhtəşəm mənzərə açılır. Bu ərazi hündürlükdə yerləşdiyindən istər gündüz, istər gecə gözəl ətrafı seyr edərək həzz almaq mümkündür.
Shimal.News-a müraciət edən izləyicilər bildirirlər ki, uzun müddətdir bu mənzərəli ərazi zəbt edilib:
“Yay axşamları bura yığılıb dincəlirdik, söhbət edirdik. Turistlər gələndə, burada ayaq saxlayıb şəkil çəkdirirdilər. Artıq uzun müddətdir ki, bura tikanlı məftillərlə hasarlanıb və ərazidə dovşan saxlayırlar. Bir neçə il öncə tikinti aparılmağa cəhd olunanda, aidiyyatı qurumlar onun qarşısını aldı. Lakin tikinti materialları, tikanlı məftillər yığışdırılmadı. İndi buranı kol-kos basıb, zibillik yığılıb, dovşanlar saxlanılır. Biz bu özbaşınalığın aradan qaldırılmasını, gözəl mənzərənin Quba sakinlərinə qaytarılmasını istəyirik”.
