Quba rayonunun Səbətlər, Qımılqazma, Təngəaltı, Afurca kəndlərindən sonra ayıların bu dəfəki hədəfi Qəçrəş olub.
Məsələ ilə bağlı Shimal.News-a məlumat verən kənd sakininin sözlərinə görə, gecə saatlarında bir neçə ayı evlərinin həyətinə girib.
“Hava qaralan kimi ayılar kəndin içində dolaşmağa başlayırlar. Kimin həyətində nə varsa, ya yeyirlər, ya hücum edirlər. Onların qorxusundan artıq nə edəcəyimizi bilmirik. Hər səhər gözümüzü fərqli bir mənzərə ilə açırıq. Kimimizin ağaclarına, kimimizin təsərrüfatına, kimimizin də heyvanlarına ziyan dəyir.
Qorxuruq ki, bir gün evlərimizin içində də ayılarla qarşılaşaq”, - deyə sakinlər bildiriblər.
Onu da xatırladaq ki, məsələ ilə bağlı açıqlama verən Ekologiya və Təbii Sərvətlər Nazirliyinin Xaçmazdakı 5 saylı Regional Ekologiya və Təbii Sərvətlər İdarəsinin əməkdaşı İlqar Ağabalayev vətəndaşların bu məqama ciddi yanaşmalı və vəhşi heyvanların kəndlərə ayaq açmasına şərait yaratmamalı olduqlarını bildirib.
