Son günlər şimal bölgəsində müşahidə olunan davamlı yağışlar Quba rayonunun meyvə bağlarında ciddi fəsadlara yol açıb. Fermerlər arasında "qaraləkə" kimi tanınan xəstəlik xüsusilə alma bağlarında geniş yayılıb.
Shimal.News xəbər verir ki, fermerlərin sözlərinə görə, havaların rütubətli keçməsi nəticəsində yaranan bu xəstəlik meyvələrin üzərində qara ləkələr əmələ gətirir və məhsulun görünüşünü yararsız hala salır. Bu isə bazarda meyvənin alıcılıq qabiliyyətini xeyli aşağı salır.
Fermer Qüdrət Əliyarov deyir ki, bu mövsüm məhsuldan yüksək gəlir gözləyirdi, lakin "qaraləkə" xəstəliyi bağlarda ciddi itkilərə səbəb olub:
"Yağışlar bir neçə gün aramsız yağdı. Bağlarımızda dərmanlama aparmışdıq, amma bu qədər rütubət xəstəliyin yayılmasını sürətləndirdi".
Mütəxəssislər isə bildirir ki, bu cür xəstəliklərin qarşısının alınması üçün vaxtında profilaktik tədbirlər – xüsusilə hava şəraitinə uyğun dərmanlama işləri vacibdir. Bağlarda tez-tez monitorinqlər aparılmalı və hava proqnozları nəzərə alınaraq mübarizə tədbirləri vaxtında həyata keçirilməlidir.
