Quba şəhərini və mərkəzə yaxın əraziləri bürüyən tüstü insanlara nəfəs almağa imkan vermir.
Bu barədə Shimal.News-a məlumat verən sakinlər bildiriblər ki, onlar yuxuda boğulmaqdan qorxurlar.
“Gecə istiyə görə pəncərələri açıq qoyub yatırıq. Evlərə pis qoxu və tüstü dolur. Dünən gecədən səhərə kimi yatan uşaqlarıma görə narahat olmuşam. Onların boğulmağından ehtiyat etmişəm. Baxın, gecə saat birdir, yenə ətrafı tüstü bürüyüb. Yəqin yenə zibilxana alışıb”, - deyə sakin bildirib.
Vətəndaşlar iddia edirlər ki, tüstünün səbəbi “Dəvə dabanı” kimi tanınan ərazidə böyük sahədə zibilliyin yandırılması ilə əlaqəlidir. Fövqəladə Hallar Nazirliyinin yanğından mühafizə bölmələri alovu hər gün söndürür. Lakin bir müddətdən sonra yenə tullantılar alışır. Orada yanan plastik, rezin, kimyəvi və digər zərərli maddələr havanı zəhərləyir.
