Quba rayonunun İsnovqışlaq kənd sakini, 1-ci qrup əlil Nəzərov Şahin Məmmədmehdi oğlunun itkin düşməsindən artıq iki həftə keçir. Mayın 20-də Şahinin özünü Samur-Abşeron kanalına atdığı ehtimal olunur. Hadisə Çağacuq kəndi yaxınlığında, kanalın Quba–Bakı avtomobil yolu ilə kəsişən hissəsində baş verib.
Shimal.News-un əldə etdiyi məlumata görə, hadisə yerində Şahinə məxsus paltar, telefon və ayaqqabılar tapılıb. Ailəsi onun həmin ərazidən kanala girdiyindən şübhələnir.
Şahin Nəzərov anadangəlmə 1-ci qrup əlil olsa da, psixoloji problemi olmayıb.
Meyitin axtarışları indiyə qədər nəticə verməyib. Sosial şəbəkələrdə yayılan bəzi məlumatlarda meyitin tapılması və suyun kəsilməsi üçün ailədən rüşvət istənildiyi iddia olunur. Məsələ ilə bağlı Shimal.News mərhumun qardaşı Nəcməddin Nəzərovla əlaqə saxlayıb.
O, rüşvət iddialarını təkzib edərək əsas problemin suyun kəsilməməsində olduğunu bildirib:
“Elə bir məsələ yoxdur, rüşvət istənilməyib. Amma kanalın suyu mütləq kəsilməlidir ki, əgər kanalda batıbsa, axtarış mümkün olsun. Bizə deyirlər ki, ərizə yazılıb, baxılır. Amma nə vaxt tədbir görüləcək, baxılacaq bilinmir”.
Ailə və kənd sakinləri hesab edirlər ki, suyun dayandırılması istintaq və axtarış işlərinin effektiv aparılması üçün vacibdir. Lakin bu tələbin yerinə yetirilməməsi onların narahatlığını daha da artırır.
