Quba şəhərinin mərkəzində yerləşən restoranlardan birində təhlükəli vəziyyət yaranıb.
Shimal.News xəbər verir ki, obyektin tikinti işləri birbaşa yüksək gərginlikli elektrik xətlərinin altında həyata keçirilir. Bu isə tikintidə çalışan işçilər və gələcəkdə orada fəaliyyət göstərəcək şəxslər üçün ciddi təhlükə yaradır.
Son vaxtlar rayonda qanunsuz tikintilərlə bağlı mübarizə tədbirləri gücləndirilsə də, şəhərin ən görünən hissəsində baş verən bu qanunsuzluğun diqqətdən yayınması ictimaiyyətdə haqlı suallar doğurur. Sakinlər bildirirlər ki, bu cür hallara göz yumulması mövcud təhlükənin miqyasını daha da artırır.
Qeyd edək ki, qanunvericiliyə görə, yüksək gərginlikli elektrik xətlərinin mühafizə zonasında hər hansı tikinti fəaliyyəti qadağandır. Bu tələblərin pozulması halında həm tikinti işlərini aparan sahibkar, həm də buna icazə verən aidiyyəti qurumlar məsuliyyət daşıyırlar.
