Qubanın Qaraçay kəndi ərazisində yeni əkilən şam ağacları artıq saralıb, bir çoxu isə tamamilə quruyub.
Sakinlərin Shimal.News-a verdiyi məlumata görə, bu vəziyyətin əsas səbəbi ağaclara ümumiyyətlə su verilməməsidir.
"Qızmar yay günlərində bir stəkan suya möhtac qalan fidanların aqibəti əvvəlcədən bəlli idi. Halbuki, hər əkilən ağac bir ümid deməkdir. Ancaq bu ümidlər sadəcə 'kampaniya günü' xatirinə əkilib, sonrasında isə unudulub. Ağaclara nəinki su verilib, hətta ən sadə aqrotexniki qulluq da göstərilməyib", - deyə kənd sakinləri bildiriblər.
Onların sözlərinə görə, nəticədə dövlət vəsaiti, vaxt və zəhmət torpaqla birlikdə havaya sovrulub.
"Kağız üzərində yaşıllıq yaratmaq gözəl görünə bilər, amma təbiət PR-la deyil, qayğı ilə yaşar. Görünür, Qaraçaydakı bu şamlar sadəcə foto çəkilib sosial şəbəkələrdə paylaşılmaq üçün əkilib. Təəssüf ki, indi həmin fotolara baxanlar fidanları deyil, biganəliyin acı nəticəsini görür", - deyə əlavə ediblər.
